العجينة راح نديروها بطريقة التخمير البارد

لكل كيلو فرينة ديري 8 غ خميرة و 700 غرام ما بارد من الثلاجة وتلمو العجينة كي تقرب تتلم زيدولها خمسة وعشرين غرام ملح وأعجنوها راح تجيكم تتلاسق فاليد اذا عندكم بيتران خير وخير

المهم كي تعجنوها مليح زيدولها عشرين غرام زيت من الأفضل زيت زيتون دخلوه مليح فيها

حطوها في إناء مدهون بالزيت مليح باش ماتلسقش وغطوها ولازم تتخمر في درجة حرارة 3 أو أقل مدة ثلاث سوايع الى خمس سوايع

راجلي واش دار، حطها فالكونجيلاتور شوية قيس ماحكمت البرودة مليييح وهبطها للفريجيدار وزاد عاود حطها فالكونجيلاتور المهم كلش كلش خلاها ثلاث سوايع (تسما اذا عندك فريجيدار قاااوي ويبرد مليييح حطيها لتحت وخلاص واذا كان ناقص ديري كيما راجلي)

مباعد جبدها وقسمها كل كرة تجي فيها ميتين وخمسين غرام (عندو بالو طويل الله يبارك كون جيت انا نقسمها عيني ميزاني ) المهم حطيهم في plat تكوني رشيتي فيه بزااف فرينة باش ماتلسقش وغطيها ببلاستيك وخليها تخمر مرة ثانية على الأقل ساعتين في درجة حرارة الغرفة (العجينة راح تكون طرييية وتلسق فاليد سايسيها وكثري الفرينة وخلاص)

ضركا نجيو للطياب، انا عندي فور عادي تاع كويزينيار ولي سقساوني على نوعها اسمها digitech

طريقة الطياب تاع البيتزا معتمدتها من قبببل خلاص وتصلحلي في أي فور بشرط برك مايكونش تاع تريسيتي ولا يكون ضعييف خلاااص

المهم نشعلو الفور مسبقا على أقصى درجة ونخليوه مدة مليحة يسخن و ال plat لي راح نطيبو فيه يكون لداخل يسخن ثاني ماتخرجوهش

نفتحو العجينة تاعنا غييير بيدينا باش مانفسدولهاش الخمور فوق papier cuisson وبكثير من الفرينة ولا السميد ونديرو الصوص والفرماج وواش حبينا كتزيين

مباعد نجبدو ال plat من الفور (بلاكم على يديكم حبيباتي راهو يكون سخووون) المهم نهزو العجينة تاعنا بال papier cuisson ونحطوها فوق ال plat وثم ثم ندخلوها طيب في الرف التحتاااني خلاص ولا اذا قدرتو تحطوها فوق النار ديراكت واحسبو خمس دقايق وشوفو اذا تحمرت من تحت شويا خلاص طابت شعلولها من الفوق على أعلى درجة وطلعو le plat للرف الفوقاني خلاص حتى يتحمرو الأطراف شويا (انا كي شفت بلي طولتلي شويا وماتحمرتش جبدها وحمرتلها الأطراف بالشاليمو) لأنو كلما تطول البيتزا فالفرن تنشف وماتجيش طرية كيما تاع برا وبصحتكممم

ايه حقا لي سقساوني على الفرماج خدم بموزاريلا شيماء تجي في صاشي زرقة وفريكو مازدام

(هاذ الكمية تخدملكم بزاف حنا فضالتلنا العجينة خبيناها فالفرجيدار واليوم الغدوة فالغدا جبدناها زوج سوايع وطيبناها ثاني جاات هاييلة درناها بصوص بلونش ضرك نحطلكم لي فوطو) طاقيو صحاباتكم 🤍